کفار کے ساتھ کونسے معاملات جائز ہے اور کونسے جائز نہیں ہے اس پر تفصیلی بحث

واضح رہے کہ اسلام میں تجارت کے جواز و عدم جواز کا مدار تجارتی فریق کے مسلم یا غیر مسلم ہونے پر نہیں ہے، بلکہ خرید و فروخت کی جانے والی اشیاء کا شرعی معاملات کے مطابق ہونا ضروری ہوتاہے۔

چنانچہ حلال ، پاکیزہ اور غیر مضر اشیاء کی خرید و فروخت مسلم یا غیر مسلم کے ساتھ کی جائے تو شرعاً اس میں کوئی ممانعت نہیں، البتہ بعض مخصوص حالات میں خاص اسباب کے تحت مخصوص اشیاء کی خرید و فروخت  کو سد ذریعہ کے طور پر منع کیا جاتا ہے: جیسے جنگی حالات میں کفار کو اسلحہ فروخت کرنا جو مسلمانوں کے خلاف استعمال ہوتا ہو اسے وقتی اسباب کے تحت ناجائز بتایا جاتاہے۔

چنانچہ اس وقت جو حربی کفار (غیر مسالم) مسلمانوں کے خلاف برسر پیکار ہیں، ان کی معاشی و عسکری طاقت میں اضافہ کا باعث بننے والے اہم اقتصادی ذرائع پر قدغن لگاناشریعت و غیرت دونوں کا تقاضہ ہے؛اس لیے غیر مسلموں کی معاشی قوت بننے والی تجارتی رسد کو ممکنہ طور پرمتاثر کرنے کا فتویٰ دیاجاتاہے، اس بناء پر سوال نامہ میں ذکر کردہ اجزاء کے جوابات ملاحظہ ہوں:

(1-7) واضح رہے کہ عام حالات میں کفار چاہے مسالم یا غیر مسالم(صلح کرنے والےیا نہ کرنے والے) ہوں،عام چیزیں چاہےاشیائے خورد و نوش ہوں یا لباس ہو بیچنا جائز ہے،البتہ ایسےعسکری و جنگی آلات فراہم کرنا جو دشمن کو قوت فراہم کریں اور دشمن کی طاقت میں اضافہ کریں،وہدشمن کو فروخت کرنا جائز نہیں ہے۔

(2) حربی مسالم(صلح والے) کافروں کی کمپنیاں جو حربی غیر مسالم کفار کے ساتھ تعاون کرتی ہیں،یا وہ ان کی حمایت اور ہمدردی کی حامل ہیں ان کمپنیوں سےایسی اشیائے خورد نوش اور دیگر اشیاءجن کا متبادل مسلمانوں کے ہاں موجود ہو،خریدنے سے اجتناب کرنا لازم ہے،اور جن اشیاء کا متبادل موجود نہ ہوتوصرف بقدرِ ضرورت اس سے استفادہ کرنے کی گنجائش ہے۔

(3) کچھ بڑی کمپنیاں جو اسرائیل کی مالی امداد کرتی ہیں،یا اسرائیل کو دفاعی و فوجی ساز و سامان فراہم کرنے میں مدد کرتی ہے،یا ٹیکنالوجی کمپنیاں جیسے گوگل، ایمزون وغیرہ اسرائیل کو کلاؤڈ کی فراہمی جیسی خدمات کرتی ہیں،توغیرتِ ایمان کا تقاضہ ہے کہ ایسی کمپنیوں کا مکمل طور پر بائیکاٹ کیا جائے،اور ان کے سافٹ وئیراور ویب سائٹس استعمال کرنے سے اجتناب کیا جائے، البتہ اگر اس کا متبادل موجود نہ ہواور اسی کمپنیوں کی خدمات آپ کے جائز استعمال کےلیے ضروری ہوں،تو صرف بقدر ضرورت استعمال کرنے کی گنجائش ہے۔

(4)مسلم ممالک میں مذکورہ کمپنیوں کے  فرنچائزاگرچہ مسلمانوں نے بھاری رقوم دےکر خریرےہوں،لیکن چوں کہ ان کمپنیوں کا خاطر خواہ منافع  اسرائیل و دیگریہودی کمپنیوں(جن کا نام استعمال کرتے ہیں) کو جاتا ہے، جو کہ ان کو معاشی طور پر مضبوط کرنا اور ان کی معیشت کو فائدہ پہنچاناہے اور یہ  منافع بھی یہود کے اسلام دشمن عزائم کی تکمیل میں استعمال ہوتے ہیں، لہذا ان کی مصنوعات کو خریدنا درحقیقت انہیں قوت پہنچانا ہے جو کہ نہ صرف مکروہ ہے بلکہ ایمانی غیرت کے خلاف ہے؛  اس لیے ایک مسلمان کو چاہیے کہ مسلمانوں پر مظالم ڈھانے والے ممالک اور ریاستوں کو فائدہ پہنچانے  سے مکمل طور پر گریز کریں، اس نوعیت کی کمپنیوں کا بائیکاٹ کرنا اسلامی غیرت، اہلِ اسلام سے یک جہتی اور دینی حمیت کا مظہر ہوگا،اگرچہ بائیکاٹ سےبظاہرکچھ مسلموں کو نقصان پہنچتاہو۔

(5)  بلا کسی ضرورت،  حاجت اور شدید مجبوری کے  محض  دولت کے حصول اور معیارِ زندگی کو بلند کرنے یا اپنے معاشرے میں معزز بننےکے لیے مسلم ملک کو چھوڑ کر  غیر مسلم ممالک  (چاہے وہ حربی مسالم کفار ہو یا غیر مسالم ہو )میں مستقل رہائش اختیار کرنا اور دار الحرب کی شناخت و قومیت کو افضل سمجھتے ہوئے دار الاسلام کی شناخت و قومیت پر ترجیح دے کر غیر مسلم ملک کی شہریت و قومیت حاصل کرنا  جائز نہیں ہے؛ کیوں کہ یہ اطلاعات عام ہیں کہ بعض مسلمانوں کی اولاد کفریہ ماحول کی زد میں آکر اپنے ایمان سے ہاتھ دھو بیٹھتی ہے۔

(6) واضح رہے بائیکاٹ کے سلسلے میں کسی کو بائیکاٹ پر مجبور کرنا، یا ان دکانداروں کی فہرست بناکرانٹرنیٹ پرجاری کرنا،اور ان کو کفار کا مددگار باور کرانا جائز نہیں ہے، البتہ دکانداروں کو پیار و محبت سے سمجھایا جائے،اور ان کو بائیکاٹ پر امادہ کیا جائے  ، نہ کہ ان کو مجبور کیاجائے۔

قرآن مجید میں ہے:

“وَتَعَاوَنُوْا عَلَى الْبِرِّ وَالتَّقْوٰى وَلَا تَعَاوَنُوا عَلَى الْإِثْمِ وَالْعُدْوَانِ. “(المائدہ، الآیة)

تفسیر جلالین  میں ہے:

“قال الله تعالی: (وَلَا تَرْكَنُوْا اِلَى الَّذِیْنَ ظَلَمُوْا فَتَمَسَّكُمُ النَّارُ)الآیة، وفي الجلالین: ولا ترکنوا تمیلوا إلی الذین ظلموا بموادة أو مداهنة أو رضي بأعمالهم فتمسّکم تصبکم النار.”

‌‌(سورة هود (11) : آية، 113، ص:301، ط: دار الحديث – القاهرة)

تفسیر ابن کثیر میں ہے:

“وقوله تعالى: وتعاونوا على البر والتقوى ولا تعاونوا على الإثم والعدوان يأمر تعالى عباده المؤمنين بالمعاونة على فعل الخيرات وهو البر، وترك المنكرات وهو التقوى وينهاهم عن التناصر على الباطل والتعاون على المآثم والمحارم، قال ابن جرير : الإثم ترك ما أمر الله بفعله والعدوان مجاوزة ما حد الله لكم في دينكم ومجاوزة ما فرض الله عليكم في أنفسكم وفي غيركم.”

(سورة المائدة، الآية:2، ج:3، ص:10، ط: دار الكتب العلمية)

فتح الباری میں ہے:

“قوله: (باب الشراء والبيع مع المشركين وأهل الحرب) قال ابن بطال: معاملة الكفار جائزة، إلا بيع ما يستعين به أهل الحرب على المسلمين.”

(کتاب البیوع،باب الشراء والبيع مع المشركين وأهل الحرب،  ج:4، ص:416، الرقم:2216، ط:المكتبة السلفية۔مصر)

عمدۃ القاری میں ہے:

“(باب بيع السلاح في الفتنة وغيرها)

 أي: هذا باب في بيع السلاح في أيام الفتنة: هل يمنع أم لا؟ وأيام الفتنة ما يقع من الحروب بين المسلمين، ولم يذكر الحكم على عادته اكتفاء بما ذكره في الباب من الحديث والأثر. قوله: (وغيرها) أي: وغير أيام الفتنة. والحكم فيه على التفصيل، وهو أن بيع السلاح في أيام الفتنة مكروه لأنه إعانة لمن اشتراه، وهذا إذا اشتبه عليه الحال، إما إذا تحقق الباغي فالبيع لمن كان في الجانب الذي على الحق، لا بأس به، وأما البيع في غير أيام الفتنة فلا يمنع لحديث الباب، فافهم.

وكره عمران بن حصين بيعه في الفتنة.أي: كره بيع السلاح في أيام الفتنة. وهذا وصله ابن عدي في (الكامل) من طريق أبي الأشهب عن أبي رجاء عن عمران، ورواه الطبراني في (الكبير) من وجه آخر: عن أبي رجاء عن عمران مرفوعا، وإسناده ضعيف.”

(کتاب البیوع،باب بيع السلاح في الفتنة وغيرها، ج:11، ص:219، ط:دار الفكر- بيروت)

شرح سنن ابی داؤد لابن رسلان میں ہے:

“وكما أنه لا يجوز حمل السلاح إلى أرض العدو،  لا يجوز أن يباع العدو شيئا مما يستعينون به في حروبهم من كراع أو سلاح،  ولا شيئا مما يرهبون به على المسلمين في قتالهم مثل الرايات وما يلبسون في حروبهم.” 

(كتاب الجهاد، باب في حمل السلاح إلى أرض العدو، ج:12، ص:121، رقم:2786، ط:دارالفلاح)

فتاوی شامی میں ہے:

“(ويكره) تحريما (بيع السلاح من أهل الفتنة إن علم) لأنه إعانة على المعصية (وبيع ما يتخذ منه كالحديد) ونحوه يكره لأهل الحرب (لا) لأهل البغي لعدم تفرغهم لعمله سلاحا لقرب زوالهم، بخلاف أهل الحرب زيلعي.”

(كتاب الجهاد، باب البغاة، ج:4، ص:268، ط: سعيد)

مسند البزار میں ہے:

“عن حذیفۃ رضی اللہ عنہ قال : قال رسول اللہ ﷺ: لیس للمؤمن أن یذل نفسہ، قالوا : یا رسول اللہ! وکیف یذل نفسہ؟ قال: یتعرض من البلاء لما لایطیق.”

(مسند حذيفة بن اليمان رضي الله عنهما، ج:7، ص:218، رقم:2790، ط:مكتبة العلوم والحكم – المدينة المنورة)

سنن أبی داؤد میں ہے:

“عن سمرة بن جندب : أما بعد قال رسول الله صلى الله عليه وسلم: «‌من ‌جامع ‌المشرك ‌وسكن ‌معه ‌فإنه ‌مثله.”

(کتاب الجھاد، باب فی الإقامةبأرض الشرک، ج:3، ص:48، الرقم: 2787، ط: المطبعة الأنصارية بدهلي)

بذل المجہود فی حل سنن أبی داؤد میں ہے:

“عن سمرة بن جندب: أما بعد، قال رسول الله صلى الله عليه وسلم: من جامع المشرك) أي: اجتمع معه في دار أو بلد، والأحسن أن يقال: معناه اجتمع معه، أي: اشترك في الرسوم والعادة والهيئة والزي، وأما قوله: (وسكن معه) علة له، أي: سكناه معه صار علة لتوافقه في الهيئة والزي والخصال (فإنه مثله) نقل في الحاشية عن “فتح الودود”: فإنه مثله، أي: يقارب أن يصير مثلًا له لتأثير الجوار والصحبة، ويحتمل أنه تغليظ.”

(کتاب الجھاد، باب فی الإقامةبأرض الشرک، ج:9، ص:525، الرقم: 2787، ط: الدراسات الإسلامية، الهند)

الجامع لاحکام القرآن للقرطبی میں ہے:

“روى الأئمة عن أبي سعيد الخدري قال: سمعت رسول الله صلى الله عليه وسلم يقول: (من رأى منكم منكرا فليغيره بيده فإن لم يستطع فبلسانه فإن لم يستطع فبقلبه وذلك أضعف الإيمان). قال العلماء: الأمر بالمعروف باليد على الأمراء، وباللسان على العلماء، وبالقلب على الضعفاء، يعني عوام الناس.”

(الآية:22، سورة آل عمران، ج:4، ص:49، ط:دار الكتب المصرية)

الاشباہ والنظائر میں ہے:

“الضرورات تبیح المحظورات.”

(القاعدۃ الخامسة،ص73،رشیدیة)

فقط واللہ اعلم